Өскеменде автобуста пневматикалық баллон жарылған соң қоғамдық көліктер ауыстырылмақ

ӨСКЕМЕН. KAZINFORM — Өскемендегі аялдамалардың бірінде Volvo маркалы автобустың пневматикалық баллоны жарылған оқиғадан соң қоғамдық көліктерді ауыстыру туралы шешім қабылданды.

Жарылған пневматикалық баллон сынықтарынан автобус күтіп тұрған 63 жастағы әйел жарақат алған болатын. Шығыс Қазақстан облысы Полиция департаментінің мәліметінше, ол бірден медициналық мекемеге жеткізілген.

— Аталған факті бойынша сотқа дейінгі тергеу басталды. Бірқатар сараптама тағайындалды. Соның қорытындысы бойынша процессуалдық шешім қабылданады, — делінген ақпаратта.

Қала әкімі Алмат Ақышов осы оқиғадан соң тиісті шаралар қабылданатынын жеткізді.

— Осы бағытта жүретін автобустар ауыстырылады. Бұл жайлылық үшін ғана емес, жолаушылардың қауіпсіздігіне де қатысты екенін түсініп отырмыз, — деді ол.

Еске салсақ, Өскеменде пойыз бен автобус соқтығыса жаздағанын жазғанбыз.