Өскеменде балабақшалар білім бөлімінен сот арқылы 60 млн теңге өндіріп алды

ӨСКЕМЕН. KAZINFORM – Өскемен қаласында жекеменшік балабақшалар білім бөлімінен сот арқылы 60 млн теңге өндіріп алды.

Биылғы жазда жекеменшік балабақшалар қабылдау жүйесіндегі блокқа байланысты балаларды өздеріне қабылдай алмай қалды. Бұл ата-аналар арасында дүрбелең тудырды. Ал мектепке дейінгі мекемелер шығынға ұшырады. Өйткені балабақшалардың табысы мен педагогтердің жалақысы әр балаға жан басына шаққандағы қаржыландыруға байланысты.

- Қалалық білім бөлімі өкілдерімен бірнеше рет кездесу өткізілсе де еш нәтиже болмады. Сондықтан кәсіпкерлерге сотқа жүгінуге тура келді, - деп хабарлады ШҚО кәсіпкерлер палатасынан.

Осылайша, 18 балабақша қалалық білім бөлімін сотқа берді. ШҚО мамандандырылған ауданаралық экономикалық сотының мәліметінше, сот процесі облыстық прокуратура мен ҚР Білім министрлігі өкілдерінің қатысуымен барынша ашық жүргізілді.

- Сот әлеуметтік саладағы кәсіпкерлерді қорғап, 60 млн теңгеден астам залалды өндіру талабын қанағаттандыру туралы шешім шығарды, - делінген хабарламада.

Еске салсақ, осыған дейін Жетісу облысында 7 жыл халықаралық іздеуде жүрген учаскелік полицей сотталғаны хабарланған.