Өскеменде Наурыз мейрамына орай қолөнер бұйымдарының көрмесі өтті
Өскемендегі А.С. Пушкин атындағы Шығыс Қазақстан облыстық кітапханада Ұлыстың ұлы күні қарсаңында бірқатар шара ұйымдастырылды.
«Келушілер «Қош келдің, әз-Наурыз!» әдеби-музыкалық қонақжайында мерекелік дастарханнан дәм татып, өнерпаздардың қазақтың ұлттық салт-дәстүріне арналған қойылымдарын көрді. Бейқам балалық шақтарын еске алып, ұлттық ойындар ойнады. Сондай-ақ қолөнер бұйымдарының көрмесін тамашалап, шеберлермен бірге бұйымдар жасады. «Ұлттық стиль – жақұтымыз» ұлттық костюмдердің арт-дефилесінде соңғы үлгімен жасалған қазақтың ұлттық киімдері мерекеге ерекше сән берді. Қонақтар киімнің тарихы, ерекшеліктері туралы да мағлұмат алды», - делінген кітапхана қызметкерлері таратқан ақпаратта.
«Қазақстан халықтарының ұлттық тағамдары» тағамдар жәрмеңкесі өткізілді. Онда қонақтарға әр түрлі ұлттық тағам түрлері ұсынылды.
«Бұдан бөлек, тұрғындар «Даналық киіз үйінде» «Наурыз тойы – мереке, салт-дәстүрім – береке» интерактивті әдебиеттер экспозициясымен танысты. «Салт-дәстүрім – салтанатым» атты ұлттық салт-дәстүрімізге арналған викторина мен «Наурыз мерекесінің тарихын білеміз бе?» квест ойынына қатысып, сыйлықтарға ие болды», - делінген мәліметте.
