Өскеменде өрт шыққан көпқабатты үйден 18 адам эвакуацияланды
ӨСКЕМЕН. ҚазАқпарат – Өскемен қаласында өрт шыққан көпқабатты үйден 18 адам эвакуацияланды, деп хабарлайды ҚазАқпарат тілшісі.
ШҚО Төтенше жағдайлар департаменті баспасөз қызметінің мәліметіне сүйенсек, 15 қаңтарда сағат 20.30 шамасында Шәкәрім даңғылындағы 4-қабатты тұрғын үйдегі пәтерлердің бірінде өрт шықты.
«Оқиға орнына өрт сөндірушілер келген кезде подъез ішін көк түтін басқан. Олар қауіпсіздік мақсатында 18 тұрғынды, оның ішінде 6 баланы дереу эвакуациялады. Денесін күйік шалған 63 жастағы үй иесі мен оның уланған 37 жастағы қызы ауруханаға жатқызылды. Көп ұзамай ТЖД қызметкерлері жалпы ауданы 8 шаршы метрді құраған тілсіз жауды толықтай ауыздықтады», - делінген ақпаратта.
Қызыл жалынды өшіруге жеке құрамнан 18 адам мен 6 техника жұмылдырылған. Алдын ала мәлімет бойынша өрттің шығу себебі – темекі шегу кезіндегі абайсыздықтан болуы мүмкін.
