Өскеменде өзін әкімдік қызметкері ретінде таныстырып, халықты алдаған алаяқ сотталды

ӨСКЕМЕН. KAZINFORM – Өскемен қаласында әкімдік қызметкері ретінде таныстырып, халықты алдап келген алаяққа сот үкімі шықты.

Қалалық №2 сотта ҚР Қылмыстық Кодексінің 190-бабы (Бірнеше рет жасалған аса ірі көлемдегі алаяқтық) бойынша қылмыстық іс қаралды.

Айыпталушы өзін әкімдік қызметкері ретінде таныстырып, әлеуметтік осал санаттағы азаматтарға үй алу үшін кезекке тұруға көмектесетіндігін айтқан. Сұраған ақшасы қолына тиген соң хабар-ошарсыз кетіп отырды. Алаяқтың айласына түскен халыққа 6 008 000 теңге көлемінде материалдық залал келтірілген.

- Сот барысында ер адам өз кінәсін толықтай мойындап, істеген ісіне өкінетіндігін жеткізді. Осыны ескерген сот айыпталушыға 3 жылға бас бостандығынан шектеу жазасын тағайындады, - деп хабарлады соттың баспасөз қызметінен.

Үкім әлі заңды күшіне енген жоқ.

Еске салсақ, бұған дейін Семейде мектеп оқушысын соққыға жыққан жеткіншектердің ата-аналарына қатысты сот шешімі шыққаны хабарланған.