Өскеменде велосипедпен келе жатқан бала жолға шығып кетіп, көлікке соғылды
ӨСКЕМЕН. ҚазАқпарат – Өскемен қаласында велосипедпен келе жатқан жасөспірім жолға шығып кетіп, көлікке соғылды, деп хабарлайды ҚазАқпарат тілшісі.
ШҚО полиция департаменті баспасөз қызметінің мәліметіне сүйенсек, жол-көлік оқиғасы Теміржолшылар көшесінде болған.
«Велосипедпен жолда келе жатқан 14 жастағы бала қарсы жолаққа шығып кетіп, Toyota Camry көлігіне соғылған. Жол апаты салдарынан жасөспірім жеңіл дәрежедегі дене жарақатын алды», - делінген ақпаратта.
Кәмелетке толмаған балаға қатысты ҚР ӘҚБтК-нің 615-бабы 1-бөлігі бойынша (жаяу жүргіншілердің және жол қозғалысының басқа да қатысушыларының жол қозғалысы ережелерін бұзуы) әкімшілік хаттама толтырылды.
