Өскеменде жол апатынан 4 полицей зардап шекті

ӨСКЕМЕН. ҚазАқпарат – Өскемен қаласында қызметтік көлікпен жол апатына түскен 4 полицей жарақат алды, деп хабарлайды ҚазАқпарат тілшісі.

ШҚО Полиция департаменті баспасөз қызметінің мәліметіне сүйенсек, жол-көлік оқиғасы 8 маусым күні Есенберлин даңғылының бойындағы айналма жолда болған. 4 полицей «УАЗ» маркалы қызметтік көлікпен шақыртудан полиция бөлімшесіне қайтып бара жатқан.

«Сол кезде қарсы бағытта келе жатқан «Toyota RAV4» көлігінің жүргізушісі рульге ие бола алмай қалып, қарсы бағыттағы қозғалыс жолағына шығып кетіп, полиция көлігіне соқтығысты. Жол апаты салдарынан 4 тәртіп сақшысы да түрлі дәрежедегі дене жарақаттарын алған. Жәдел жәрдем қызметкерлері оларға медициналық көмек көрсетті», - делінген ақпаратта.

Жол апатына себепкер болған «Toyota RAV4» көлігінің жүргізушісіне қатысты ҚР ӘҚБтК-нің 610-бабы 1-бөлігі бойынша әкімшілік хаттама толтырылды.