Өскеменде жол үстінде шағын автобус жанып кетті

ӨСКЕМЕН. ҚазАқпарат - Бүгін Өскеменнің сол жағалауындағы жолда № 262 рейсінің автобусы толықтай жанып кетті, деп хабарлайды «ҚазАқпарат» ХАА тілшісі.

Жүргізуші отқа оранған көлікті жолдың шетіне алып шығып үлгереді. Өрт сөндірушілер келгенге дейін автобус толықтай жанып кеткен. Қалалық ТЖ қызметінің дерегіне сүйенсек, шағын автобустан өз бағытымен жолда кетіп бара жатқан сәтте өрт шыққан. Оқиға орнында жедел қызмет жұмыс жасап жатыр. Алдын ала нұсқа бойынша, өрт - қауіптілігі жоғары агрегатты абайсыз қолдану салдарынан болған.  

«Өртті өзі сөндірмек болған жүргізуші қолын күйдіріп алды. Одан басқа ешкім зардап шеккен жоқ, - деп хабарлады Өскемен ТЖБ баспасөз қызметі. - Өрттің аумағы шамамен 10 шаршы метрді құрайды. Өрттің шығу себебі ретінде қауіптілігі жоғары агрегатты абайсыз қолдану нұсқасы  қарастырылып отыр».