Отандық әуе компаниялар жолаушыларды БАӘ мен Қатардан елге жеткізеді

АСТАНА. KAZINFORM — Бүгін SCAT және Air Astana әуе компаниялары Дубай мен Доха қалаларынан Алматы мен Астанаға 6 рейс орындайды, деп хабарлайды Көлік министрлігінің баспасөз қызметі.

Ведомство мәліметінше, Таяу Шығысқа ұшулар әлі де алты мемлекеттің (Иран, Израиль, Ирак, Иордания, Сирия және Ливан) әуе кеңістігін айналып өту арқылы жүзеге асырылып жатыр.

— Мәселен, Air Astana 25 маусымнан бастап Дубайдан Алматы мен Астанаға, сондай-ақ Дохадан Алматыға ұшатын әуе рейстерін қайта іске қосты. Бүгінгі күнге дейін шегеріліп келген рейстердің жолаушыларын елге қайтару үшін қосымша репатриациялық рейстер де ұйымдастырылады. «SCAT» әуе компаниясы азаматтарды Катар елінен Қазақстанға шығара бастады. «Доха-Алматы» рейсі бүгін Катар уақытымен сағат 07:35–те орындалды. Бортта 213 жолаушы болды. Сондай-ақ, бүгін «Доха-Астана» рейсі орындалады. Борт Дохадан Катардың жергілікті уақытымен сағат 14:30–да ұшады деп жоспарланған. Жолаушылардың саны — 290 адам, — делінген министрлік хабарламасында.

Азаматтарды әкетуге арналған келесі жоспарланған чартерлік рейстер:

27.06.25 Доха-Астана
29.06.25 Доха-Алматы

Бұдан бұрын Қазақстан әуе компаниясы 25 маусымнан бастап Таяу Шығысқа қайта ұшатынын жазғанбыз.