Отарда комаға түскен сарбаз соққыға жығылған – Қорғаныс министрлігі

АСТАНА. KAZINFORM – ҚР Қорғаныс министрлігінің ресми өкілі Руслан Жангулин Жамбыл облысы Отар ауылында сарбаздың комаға түсуі туралы пікір білдірді. Кінәліге қатысты тергеу іс-шаралары жүріп жатыр.

«Мерзімді қызметтегі әскери қызметші қазір Алматы қаласындағы әскери-клиникалық госпитальде жатыр. Оған барлық қажетті медициналық көмек көрсетілуде. Әскери дәрігерлер және басқа да мамандар оны күн сайын тексеріп, барлық емдеу шараларын жүргізуде. Қазіргі уақытта оның жағдайы тұрақты ауыр деп айтуға болады, бірақ жақсарулар бар», - деді ресми өкіл Орталық коммуникациялар қызметінде.

Спикердің айтуынша, өкілеттігін шамадан тыс асырған екінші әскери қызметшіге қатысты әскери-тергеу органдары тергеу іс-шараларын жүргізуде. Ол – келісімшарт бойынша әскери қызметте жұмыс істеген.

«Тергеу мүддесі үшін басқа ақпарат жария етілмейді», - деді Р. Жангулин.

Айта кетейік, Жамбыл облысында сарбаз жансақтау бөліміне түскен еді. Оқиға 9 маусым күні болған. Жамбыл облыстық денсаулық сақтау басқармасы баспасөз қызметі сарбаздың жағдайы ауыр екенін мәлімдеген.

Президент Қасым-Жомарт Тоқаев сарбаздың комаға түсуіне қатысты мән-жайды зерттеп, кінәлі адамдарды жазалауды талап етті.