Өткен айда еліміздің ірі және орта кәсіпорындарына 77 мың адам жұмысқа қабылданды
АСТАНА. Маусымның 12-сі. ҚазАқпарат /Қанат Мәметқазыұлы/ - Cтатистика агенттігінің таратқан жедел деректеріне сәйкес, ағымдағы жылғы мамыр айында еліміздің ірi және орта кәсiпорындарына және ұйымдарына 77,0 мың адам жұмысқа қабылданды, түрлі себептермен - 66,3 мың адам жұмыстан кетті.
Жұмыстан кеткен қызметкерлердiң арасында өз еркі бойынша жұмыстан босатылғандар 79,0 пайызды, қызметкерлер санының қысқаруына байланысты босағандар - 1,8 пайызды, басқа себептер бойынша - 19,2 пайызды құрайды.
Сонымен бірге, ағымдағы жылғы мамыр айында жұмысқа қабылдау бойынша айналым коэффициенті 2,6 пайыз, жұмыстан босату бойынша айналым - 2,2 пайыз, кадр тұрақсыздығы - 1,8 пайызды құрады. Есепті кезеңде жұмыстан босатылған қызметкерлер санынан 116,0 пайызы қайта қабылданған кадрлармен толықтырылды.
