Өткен айда Қазақстанның ірі және орта кәсіпорындарына 100 мыңға жуық адам қабылданды
АСТАНА. 21 қазан. ҚазАқпарат - Жедел деректерге сәйкес ағымдағы жылғы қыркүйекте ірi және орта кәсiпорындарға, сондай-ақ ұйымдарға 99,3 мың адам қабылданды, түрлі себептермен - 88,8 мың адам жұмыстан кетті. Бұл туралы ҚР Статистика агенттігінен хабарланды.
Жұмыстан кеткен қызметкерлердiң арасында тұрақтамау себептері бойынша жұмыстан босатылғандар 86,7%, қызметкерлер санының қысқартылуына немесе кәсіпорынның таратылуына байланысты - 3,7%, басқа себептер бойынша - 9,6% құрайды.
Ағымдағы жылғы қыркүйекте жұмысқа қабылдау бойынша айналым коэффициенті 3,1%, жұмыстан босату бойынша айналым - 2,7%, жұмыс күшінің тұрақсыздық коэффициенті - 2,4% құрады. Осы кезеңде жұмыс күшін ауыстыру коэффициенті 111,8% құрады.
