Өткен демалыс күндері елордада жол ережесін бұзудың 1 144 фактісі тіркелді
АСТАНА. Тамыздың 10-ы. ҚазАқпарат - Өткен аптада Астанада 6 жол-көлік оқиғасы тіркеліп, оларда 9 адам түрлі жарақаттар алды, қаза болғандар жоқ,
деп хабарлады Астана қаласы Ішкі істер департаментінің жол полициясы басқармасынан.
Өткен демалыс күндері жол полициясы басқармасы жол қозғалысы ережелерін бұзудың 1 144 түрлі фактісін анықтады.
Жол полициясынан хабарлағандай, рульге мас болып отырған 75 жүргізуші ұсталды. Оған қоса, жылдамдықты асырғандары үшін 213 жүргізушіге әкімшілік хаттама толтырылды.
Елордалық 9 автоәуесқой жолдың қарсы бетіне шығып кетсе, 27 жүргізуші құжатсыз көлікке отырған. Анықталған жүргізушілердің «темір тұлпарлары» айып тұрағына қойылды.
Ескертудің көп жасалғанына қарамастан, жүргізушілер жүріп бара жатып, ұялы телефонмен сөйлескенді азайтпай отыр. «Телефонмен сөйлескіш» 20 жүргізушіге айыппұл салынды.
Оған қоса, жүргіншілер өткелінде ереже бұзған адамдарға да 19 әкімшілік хаттама толтырылды. Жаяу жүргіншілер де жүргізушілерден «қалысар емес», жол ережесін бұзған бес жаяу жүргіншіге әкімшілік хаттама толтырылды.
Өткен аптаның ішінде Астанада 75 көлік айып тұрағына қойылды.
