Өзбекстанда $38,9 млрд мемлекеттік органдардың бақылауынан тыс қалып отыр

ТАШКЕНТ. KAZINFORM – Былтыр Өзбекстанда бақыланбайтын экономиканың көлемі 505 трлн сумнан (шамамен $38,9 млрд) асты, деп хабарлайды Kazinform агенттігінің меншікті тілшісі.

Статистика агенттігінің мәліметінше, бақыланбайтын экономиканың жалпы ішкі өнімдегі (ЖІӨ) үлесі 34,8%-ға жетті. Бұған көрсетілген қызметтер көлемін әдейі жасыру және бейресми жұмыспен қамту себеп болып отыр.

Ведомствоның ақпаратына сай, елдегі бейресми экономиканың көлемі 383,64 трлн сум ($29,5 млрд) болса, тағы 122 трлн сум ($9,4 млрд) көлеңкеде қалып отыр.

Қаражатын есепке алу мүмкін болмай тұрған секторлардың көшін ауыл, орман және балық шаруашылықтары бастап тұр. Одан кейінгі үлес құрылыс, қызмет көрсету және өнеркәсіп салаларына тиесілі.

Тоқтала кетейік, бақыланбайтын экономика - бұл статистика органдары толық есепке ала алмай отырған айналымдағы қаражат. Оған бейресми және көлеңкелі экономика кіреді.

Еске салайық, 2023 жылы көлеңкелі экономикадан Өзбекстанның мемлекеттік бюджетіне $2,4 млрд залал келді.

Былтыр Өзбекстанның Экономика және қаржы министрі Джамшид Кучкаров елдегі көлеңкелі экономиканың көлемі жалпы ішкі өнімнің 25-тен 45 пайызына дейінгі аралықта екенін айтқан еді.