Өзбекстанда бензин бағасы 15 пайызға артты
ТАШКЕНТ. 10 желтоқсан. ҚазАқпарат /Құрмат Самархан/ - Өзбекстанда бензин бағасы 15 пайызға артып кетті, деп хабарлайды осы республиканың бұқаралық ақпарат құралдары.
Үкіметтің 10 желтоқсандағы қаулысына сәйкес Өзбекстандағы бензин бағасы 15 пайызға артты. Жұма күнгі сағат 00.00-ден бастап жанар-жағармай бекеттеріндегі Аи-80 бензині 1405 сомға немесе бұрынғы 1220 сом бағадан 185 сомға қымбат сатыла бастады (ресми курс бойынша 1 АҚШ доллары өзбектің 1635,44 сомына тең)
Аи-91 маркалы бензиннің бағасы бұрынғы 1350 сомға емес,1555 сомға сатылады, яғни 205 сомға қымбаттаған, ал Аи-95 бензині 225 сомға қымбаттап, 1500 сомнан 1725 сомға сатылатын болды.
Басылымдардың жазып өткеніндей, бензин тұтыну салығы 1 қаңтардан бастап 25 сомға артқаны ескерілместен, жыл басынан бері осымен екінші рет қымбаттап отыр. 1 шілдеден бастап жанармай бағасы тағы да 15 пайызға артқан болатын.
