Өзбекстанда Ханабадтағы және Әндіжандағы лаңкестікке қатысты кінәлі адамдар бойынша ашық сот өтеді
ТАШКЕНТ. Маусымның 4-і. ҚазАқпарат /Расул Бахамов/ – Өзбекстанда кеше елдің Бас прокуроры Рашитжон Қадыров бастаған арнайы комиссия құрылды. Оның міндетіне 2009 жылғы мамырдың 26-сында жасалған лаңкестік актісі бойынша қозғалған қылмыстық іс жөнінде ашық сот тыңдауын даярлау және өткізу енеді.
ҚазАқпараттың бұған дейін хабарлағанындай, ресми деректер бойынша ағымдағы жылғы мамырдың 25-інен 26-сына қараған түні Ханабадта және мамырдың 26-сы күні күндіз Әндіжанда лаңкестік оқиғасы орын алған. ӨР Бас прокуратурасы «алын-ала деректер бойынша топтың Әндіжан облысының аумағына көршілес Қырғызстаннан енгенін» ресми түрде мәлімдеді. Лаңкестікті мойнына алған нақтылы адамдар, олардың азаматтығы немесе ұйымдары туралы ресми мәліметтер түскен жоқ.
