Өзбекстанда Орталық Азиядағы алғашқы шоколад мұражайы ашылды

ТАШКЕНТ. KAZINFORM – Өзбекстанда Орталық Азиядағы алғашқы шоколад мұражайы ашылды, деп хабарлайды UPL.uz.

Жақында этнографиялық «Наурыз» саябағында бірегей мәдени орталық – Шоколад мұражайы жұмыс істей бастады. Бұл жоба Iman Chocolate & Fruits компаниясының бастамасымен жүзеге асырылды.

Мұражай келушілерді шоколад тарихымен таныстырады. Ол жерде ежелгі өркениеттерден қазіргі кондитерлік өнерге дейінгі үдеріс туралы ақпарат беріледі.

Көрмеде Өзбекстанның және әлемнің сәулет ескерткіштерінің шоколадты миниатюралары, тарихи тұлғалардың мүсіндері қойылған. Мұнда барлығы 19 экспонат бар, оның 16-сы – мұражай шеберлерінің қолымен жасалған эксклюзивті шоколад мүсіндері. 

Сондай-ақ көрмеде Ташкент пен Самарқандтағы медреселер, Келте мұнар-Кіші мұнара, Әлішер Науаи мен Әмір Темір, сондай-ақ Тәж-Махал, Азаттық мүсіні, Эйфель мұнарасы, Колизей, Таностың қолы сияқты пішіндер қойылған. 

Бұл өнер туындыларына 850 кг негізінен қара шоколад жұмсалды, екі нысан ақ шоколадтан жасалған. Әрбір мүсінге кемінде жеті күндік жұмыс қажет болды. Олар шоколадты лакпен қаптаған және тиісті жағдайларда бір жылға дейін сақталуы мүмкін.

Мұнда келушілер шоколадтың тарихымен танысып, экспонаттарға қол тигізе алады. Мұражайда шоколад жасау процесі толық көрсетілген өндірістік шеберхана да бар.

Жақында тәжірибелі кондитерлердің жетекшілігімен шеберлік сабақтары ұйымдастырылады. Бұл мұражайдың ашылуы мәдени туризмді дамытуға және ұлттық кондитерлік өнерді танымал етуге ықпал етеді деп күтіліп отыр. 

Еске сала кетейік, Өзбекстанда жеке тұлғалардың шетелден тауар әкелуіне шектеу күшейтілді.