Өзбекстандықтар бес айда отанына 4 млрд доллардан астам ақша аударған
ТАШКЕНТ. ҚазАқпарат – 2022 жылдың бес айында Өзбекстанға аударылған ақша көлемі өткен жылдың сәйкес кезеңімен салыстырғанда 61%-ға артқан, деп хабарлайды ҚазАқпарат меншікті тілшісі Өзбекстанның Орталық банкіне сілтеме жасап.
Қаржы реттеушісінің мәліметінше, бес ай ішінде елге 4,19 млрд доллар сомасында трансшекаралық аударымдар түскен.
Бұл өткен жылдың сәйкес кезеңімен салыстырғанда 1,58 млрд долларға (61%) көп.
Валюта айырбастау операцияларының көрсеткіштері де күрт өскен.
2022 жылғы қаңтар-мамырда банктер халықтан 4,32 млрд долларға валюта сатып алған.
Бұл өткен жылдың сәйкес кезеңімен салыстырғанда 1,6 млрд долларға немесе 59%-ға артық.
Тек мамыр айының өзінде сатып алу көлемі 1,05 млрд долларды құрады.
Бұл ретте банктер халыққа 2,8 млрд доллар сатты. Бұл өткен жылғы көрсеткіштен 1,7 млрд долларға немесе 70%-ға көп.
