Пәкістандық премьер-министр газсыз қалды
АСТАНА. ҚазАқпарат - Бір апта бұрын Пәкістан премьер-министрі Наваз Шариф елде тұрғын үй-коммуналдық шаруашылық қызметінің төлемдері уақтылы болуын қатаң бақылауға алуды тапсырған еді.
Енді міне тиісті төлем жасамағандықтан, оның резиденциясы газсыз қалды, деп жазды Pakistan Today газеті.
Белгілі болғандай, «борышкерлерге қарсы күрес» жүргізуге шақырған премьер қарызға белшесінен батқандардың қатарынан бір-ақ шыққан. Газды тоқтатқанға дейін оның қарызы 4,7 млн. пәкістандық рупийден (шамамен $48 000) асқан.
Sui Northern Gas Pipelines Limited (SNGPL) газбен жабдықтау компаниясы анықтағандай, парламент ғимаратында да газ үшін төлемдер жасалмаған. Сөйтіп олардың борышы 7,7 миллион рупийді ($78 000) құраған. Өзге де мекемелерде осындай жағдай орын алған.
