Параны «айфон» күйінде алған аудан әкіміне сот үкімі шықты
НҰР-СҰЛТАН. ҚазАқпарат – Нұр-Сұлтан қаласы Байқоңыр ауданының әкімі Асқар Есіловке пара алғаны үшін 15 млн теңге айыппұл салынды, деп хабарлайды ҚазАқпарат тілшісі.
«Аудан әкімі 2019 жылдың қараша айында Нұр-Сұлтан қаласындағы «Байқоңыр» ауданының аумағын абаттандыру бойынша қосалқы мердігерлік жұмыстарды алуға көмектескені, сондай-ақ жалпы қамқорлығы үшін жеке компания өкілінен «IPHONE»-ның соңғы үлгісі түрінде пара алды деген күдікке ілінген», - деді Сыбайлас жемқорлыққа қарсы іс-қимыл агенттігінің 1-ші департаментінің аға тергеушісі Данияр Бекайдаров елордада өткен баспасөз мәслихатында.
Аудан әкімімен бірге қылмыстық жауапкершілікке «Dory build» ЖШС өкілі С.Нұртазин де тартылған. Тергеу барысында күдіктілер кінәсін мойындаған.
«Есіл аудандық №2 сотының үкімімен Есілов 15 млн 450 мың теңге және Нұртазинге 7 млн 725 мың теңге сомасында айыппұл салынды. Олар өмір бойы мемлекеттік қызметте қызмет атқару құқығынан айырылды», - деді аға тергеуші.
