Париж-2024: Батутта секіруден Данил Мусабаев финалға шыға алмады
ПАРИЖ. KAZINFORM — Франция астанасы Париж қаласында өтіп жатқан Олимпиада ойындарында бүгін батутта секіруден қазақстандық Данил Мусабаев іріктеу жарысында қателік жіберіп, финалға шыға алмады.
Ол бірінші жаттығудан соң финалға шығатын сегіз спортшының қатарында тұрған еді. Өкінішке қарай, екінші жаттығуында 10 сальтоның жетеуін ғана айналып, батуттан шығып кетті.
Бүгін қазақстандық спортшылар спорттың 8 түрінен - стендтік ату, академиялық есу, дзюдо, жеңіл атлетика, жүзу, семсерлесу, бокс және батут гимнастикасынан бақ сынап жатыр.
Енді бір сағаттан кейін әйелдер арасында Карина Ибрагимова ширек финалға шығу үшін пуэрто-риколық Ашлэйн Мотта Лозадамен бокстасады. Сонымен қатар, 3 тамызға ауған түні, 00:20-да ерлер арасында қазақстандық Сәкен Бибосынов пен өзбек Хасанбой Дусматов арасындағы ширек финал жекпе-жегі өтеді.
