Париж Олимпиадасында бақ сынайтын Ислам Сәтпаевтің қандай жетістіктері бар

АСТАНА. KAZINFORM – Спортшылардың басты арманына айналған Париж Олимпиадасы күн санап жақындап келеді. Әлемдік дүбірлі додаға қатысатын саңлақтарымыздың бірі - нысана көздеуден ел намысын қорғайтын – Ислам Сатпаев. Ол Париж Олимпиада ойындарында нысана көздеуден Қазақстан үміт артатын басты спортшылардың бірі. Жерлесіміз төртжылдықтың басты додасының жолдамасына 2023 жылы Бакуде өткен әлем чемпионатында қол жеткізген болатын. 

Сәтпаев 1998 жылы 21 қыркүйекте Алматы қаласында дүниеге келген. Нысана көздеумен 13 жасынан бастап айналысып келе жатыр. Қазіргі жеке бапкері - Геннадий Насонов.

Енді әр жылдардағы жетістіктеріне жеке-жеке тоқталып өтсек.

Ханчжоудағы жазғы Азия ойындарының қола жүлдегері (аралас жұптық сын, 2023 жыл);

Әлем кубогының 2 дүркін күміс жүлдегері (Джакарта, 2023 жыл);

Әлем кубогының 2 дүркін қола жүлдегері (Джакарта, 2023 жыл; Баку 2022 жыл);

Командалық сында Азия чемпионы (Чханвон, 2023 жыл);

Азия чемпионатының қола жүлдегері (аралас жұптық сын, Тэгу, 2022 жыл);

Винтовкамен 10 метрден нысана көздеуден Қазақстан рекордсмені (Баку, 2023 жыл);

Ислам Сәтпаев Париж Олимпиадасының жолдамасы сарапқа салынған 2023 жылығы Бакуде өткен әлем чемпионатында пневматикалық винтовкамен 10 метрден нысана көздеудің финалында 4-орынға тұрақтады.

Естеріңізге сала кетейік, Франция төрінде алауы тұтанатын XXXIII жазғы Олимпиада ойындары осы жылдың 26 шілдесі мен 11 тамызы аралығында өтеді. Онда 32 спорт түрінен 329 медаль жиынтығы сарапқа салынады.