Париж Олимпиадасының лицензиясына таласатын мергендеріміз анықталды

Кувейт астанасында стенд атудан Париж Олимпиадасына жолдама сарапқа салынатын Азия чемпионатына қатысатын Қазақстан ұлттық құрамасы белгілі болды, деп хабарлайды Kazinform. 

ҚР Туризм және спорт министрлігі Спортты дамыту дирекциясының баспасөз қызметі мәлім еткендей, аталған Сарықұрлық додасы 12-22 қаңтар аралығында өтеді. Аталған Азия біріншілігінде келе жатқан Париж Олимпиадасының 8 лицензиясы сарапқа салынады. Яғни, әр жаттығу түрінде екі жолдамадан беріледі. Бұл жарыста Қазақстан құрамасы да бақ сынап, Олимпиада жолдамасына таласады. 

Скит бағдарламасы: Әсем Орынбай, Ольга Панарина, Зоя Кравченко, Эдуард Ещенко, Александр Ещенко, Александр Мухамедалиев, Илья Пенков, Максим Почивалов, Ратмир Еникеев;

Трап бағдарламасы: Айжан Досмағамбетова, Мария Дмитриенко, Анастасия Прилепина, Максим Бедарев, Әлішер Айсалбаев, Виктор Хасянов, Богдан Конченко, Никита Моисеев, Никита Чикулаев.

Бас бапкер – Сергей Колос.

Жалпы чемпионатқа 40 мемлекеттен 500-ден астам мерген қатысады. Жарысты Халықаралық нысана көздеу федерациясы тікелей эфирде көрсетеді.

Естеріңізге сала кетейік, жарты жылдай уақыт қалған басты додаға ел құрамасы қазірге дейін спорттың 8 түрі бойынша 17 лицензия алып үлгерді.

Атап айтсақ, қазақстандық спортшылар жаңа жылға дейін садақ ату, велошоссе, оқ ату, қазіргі бессайыс, грек-рим және еркін күрес, бокс және спорттық гимнастикадан жолдама жеңіп алды.

Париждегі Олимпиада ойындары осы жылдың 26 шілдесі мен 11 тамызы аралығында өтеді.