Парламент көші-қон туралы заңды қабылдады
АСТАНА. KAZINFORM – Мәжілістің жалпы отырысында палата депутаттары «Қазақстан Республикасының кейбір заңнамалық актілеріне халықтың көші-қоны және қылмыстық-атқару жүйесі салаларындағы заңнаманы жетілдіру мәселелері бойынша өзгерістер мен толықтырулар енгізу туралы» заңына Сенаттың жаңа редакцияда ұсынған жекелеген баптарымен келісті.
«Заңнама және сот-құқықтық реформа комитеті аталған заңның жекелеген баптарына Сенат енгізген өзгерістер мен толықтыруларды қарап шығып келесіні атап өтеді.
Пенитенциарлық жүйе мекемелерінде бейнебақылау жүйелерін қасақана жойғаны немесе бүлдіргені үшін қылмыстық жауаптылықтың енгізілуіне байланысты Сенат депутаттары осы норма қолданылатын қылмыстық-атқару жүйесі мекемелерін тергеу изоляторларымен және уақытша ұстау изоляторларымен толықтыруды ұсынды.
Сонымен қатар, Сенат депутаттары жазаның баламалы түрлерін болдырмайтын түзетулер мен нақтылау сипатындағы түзетулер ұсынды. Аталған өзгерістер мен толықтырулар Мәжілісі қабылдаған заңның тұжырымдамасын өзгертпейді.
Осыған байланысты «Қазақстан Республикасының кейбір заңнамалық актілеріне халықтың көші-қоны және қылмыстық-атқару жүйесі салаларындағы заңнаманы жетілдіру мәселелері бойынша өзгерістер мен толықтырулар енгізу туралы» Қазақстан Республикасы Заңының жекелеген баптарына Қазақстан Республикасы Парламентінің Сенаты енгізген өзгерістер мен толықтырулармен келісуді ұсынамыз. Қолдауларыңызды сұраймыз», - деді депутат.
Осылайша Мәжіліс депутаттары Сенаттың жаңа редакцияда ұсынған жекелеген баптарымен келісті.
Айта кетейік, өткен аптада Сенат халықтың көші-қонына қатысты заңды Мәжіліске қайтарған болатын.
«Сонымен қатар, осы заңмен, ауыр немесе аса ауыр қылмыстар жасаған шетелдіктердің Қазақстан Республикасына келуiне тыйым салатын негіздер кеңейтіліп отыр. Осыған байланысты қылмыстық-процестік кодекстің нормаларына сәйкес келтіру мақсатында, «Шетелдiктердiң құқықтық жағдайы туралы» және «Халықтың көші-қоны туралы» ҚР заңдарына тиісті толықтырулар енгізілді», - деген еді сенатор Советбек Медебаев.
