Парламент ТМД еңбекші-мигранттарының құқықтық мәртебесі туралы конвенцияны қабылдады
АСТАНА. Желтоқсанның 11-і. ҚазАқпарат /Қанат Мәметқазыұлы/ - Бүгін ҚР Парламенті Сенатының жалпы отырысында палата депутаттары «Тәуелсіз Мемлекеттер Достастығына қатысушы мемлекеттердің еңбекші-мигранттары мен олардың отбасы мүшелерінің құқықтық мәртебесі туралы конвенцияны ратификациялау туралы» Заңды қабылдады. Құжат Елбасының қол қоюына жіберіледі,
деп хабарлайды ҚазАқпарат.
Аталмыш конвенцияға 2008 жылдың қарашасында Кишинеу қаласында қол қойылған. Конвенцияның мақсаты еңбекші -мигранттарға, олардың отбасы мүшелеріне және қабылдаушы мемлекеттің азаматтарына қатысты тең қарауды қамтамасыз ету үшін жағдай жасау болып табылады. Сондай-ақ құжат бойынша конвенцияға қатысушы мемлекеттер аумақтары бойынша жұмыс күшінің жүріп-тұруына қолайлы шаралар қабылдау көзделеді. Конвенцияның күші қабылдаушы тараптың аумағында заңды негізде жүрген барлық еңбекші-мигранттармен олардың отбасы мүшелеріне қолданылады. Әрбір еңбекші-мигрантпен оның отбасы мүшесі тараптардың кез келгенінің аумағында оның заңнамасына және халықаралық шарттарына сәйкес өзінің құқықтық субъектілігінің танылуына құқығы бар. Конвенцияға қатысушылар еңбекші-мигранттармен олардың отбасы мүшелерінің құқықтарын іске асыруға кепілдік береді. Қазақстан Республикасы конвенцияға қосылу барысында тиісті ескертпемен қол қойған болатын. Онда еліміздің еңбекші-мигранттарды әлеуметтік қамсыздандыруға және оларға жалпы, қосымша кәсіптік білім беруге қатысты нормаларды қолданған кезде Қазақстан өзінің ұлттық заңнамасын басшылыққа алатындығы туралы ескертпесін жазған.
