Парсы шығанағында 132 млн баррель мұнай тасымалдаған кемелер бөгеліп тұр

АСТАНА. KAZINFORM — Парсы шығанағы аумағында шамамен 20 мың теңізші мен 2 мыңға жуық кеме, оның ішінде 132 млн баррель мұнай тасымалдап келе жатқан кемелер Ормуз бұғазы маңындағы жағдайға байланысты бөгеліп қалды. Бұл туралы CNN арнасына сілтеме жасап, БЕЛТА хабарлады.

Бұған дейін Иран АҚШ тарапынан теңіз блокадасы жалғасқан жағдайда Ормуз бұғазын қайта жабуы мүмкін екенін мәлімдеген болатын.

Иранның Сыртқы істер министрі Аббас Аракчи атысты тоқтату кезеңінде Ормуз бұғазы арқылы барлық коммерциялық кемелердің өтуіне толық рұқсат берілгенін айтқан.

Ал АҚШ президенті Дональд Трамп Вашингтон Иран порттарына қатысты теңіз блокадасын тараптар түпкілікті келісімге келгенге дейін сақтайтынын мәлімдеді.

Өз кезегінде Tasnim агенттігі Иранның Жоғары ұлттық қауіпсіздік кеңесіндегі дереккөзге сілтеме жасап, егер АҚШ блокадасы жалғасса, Иран Ормуз бұғазындағы кеме қатынасын қайта тоқтатуы мүмкін екенін хабарлады.

Ал бүгін Иран Ормуз бұғазы арқылы транзит үшін есеп айырысуды риалмен жүргізуді ұсынды.