Патологоанатомдар Көкшетаудағы жүкті келіншектің өліміне не себеп болғанын анықтай алмады
КӨКШЕТАУ. ҚазАқпарат - Көкшетаудың перинатальдық ортылығында жүкті келіншектің көз жұмуы себебін патологоанатомиялық тексеріс анықтай алмады. Дәрігерлер сот-медициналық сараптаманың қорытындысын күтіп отыр, деп хабарлайды ҚазАқпарат тілшісі.
«Жүкті келіншектің өліміне қатысты оқиғаға байланысты әзірге ештеме айта алмаймын. Келіншек аз мөлшерде - 1300 мл. қан жоғалтты. Ол одан өлуі мүмкін емес. Дәрігерлік қажетті көмектің барлығын көрсетті. Қасында тәжірибелі екі акушер-гинеколог болды. Келіншектің қан қысымы жоғары болғандықтан, ол станционарға жатқызылған. Біз патологоанатомиялық тексеріске қатыстық. Патологоанатомның өзі өлімнің себебін анықтай алмады. Енді сот-медициналық сараптаманың қорытындысын күтетін боламыз», - деп түсіндірді ҚазАқпарат тілшісіне Ақмола облысының денсаулық сақтау басқармасы басшысының ана мен бала денсаулығын қорғау жөніндегі орынбасары Татьяна Бишораева.
Дәрігердің сөзінше, келіншектің нәрестесі тірі.
Еске сала кетейік, тамыздың 06-сы күні Көкшетаудағы перинатальдық орталықта Краснояр кентінің тұрғыны - 25 жастағы келіншек көз жұмған болатын. Оқиғаға байланысты ҚР ҚК 317-бабының 3-бөлігі (Медицина немесе фармацевтика жұмыскерiнiң кәсiптік мiндеттерiн тиiсiнше орындамауы) бойынша іс қозғалып, сотқа дейінгі тергеу амалдары жүргізілуде.
