Патрушев: Путин Бейжіңге барып, Си Цзиньпинмен келіссөз жүргізуді жоспарлап отыр

Ресей президенті Владимир Путин мен ҚХР төрағасы Си Цзиньпин қазанда Бейжіңде келіссөз жүргізуі ықтимал. Бұл туралы РФ Қауіпсіздік кеңесінің хатшысы Николай Патрушев стратегиялық қауіпсіздік бойынша ресей-қытайлық кеңесте мәлім етті, деп хабарлайды ҚазАқпарат ТАСС-қа сілтеме жасап.

«Қазанда Ресей президенті «Бір белдеу – Бір жол» халықаралық форумына қатысып, ҚХР төрағасы Си Цзиньпинмен Бейжіңде екіжақты келіссөз жүргізеді деген жоспар бар», - деді ол.

Патрушев Мәскеу мен Бейжіңнің қарым-қатынасы сыйластық, бір-бірінің ішкі ісіне араласпау, халықаралық аренада өзара қолдауға негізделгенін және «бағалы әрі сыртқы жағдаяттан тысқары» екенін атап өтті.

«Бір белдеу – Бір жол» бастамасын 2013 жылы Си Цзиньпин көтерді, ол баяғы Жібек жолын жаңғыртуды көздейді. Мақсаты – Қытайдың Орта Азия, Таяу Шығыс, Еуропа, Африка мен басқа да өңір нарықтарына шығып, көптеген елді қатыстыра отырып, қызығушылық танытқан мемлекеттердің капиталын пайдаланып, халықаралық сауда-инвестиция жобаларын жүзеге асыру. Бастамаға 150-ден астам мемлекет пен халықаралық ұйым қосылған.