Павел Дуров Digital Bridge-2025 форумына қатысу үшін Астанаға келеді
АСТАНА. KAZINFORM — Telegram мессенджерінің негізін қалаушы әрі СЕО-сы Павел Дуров 2025 жылғы 2 қазанда Астанада өтетін Digital Bridge форумының пленарлық отырысында сөз сөйлейді. Бұл туралы ҚР Цифрлық даму, инновациялар және аэроғарыш өнеркәсібі министрі Жаслан Мәдиев әлеуметтік желідегі парақшасында хабарлады.
Сол күні Мемлекет басшысы Қасым-Жомарт Тоқаевтың қатысуымен Alem.ai халықаралық жасанды интеллект орталығының ашылуы жоспарланған.
Форумның басты сессиясында әлемдік технология индустриясының спикерлері қатысады: БАӘ-нің жасанды интеллект, цифрлық экономика және қашықтан жұмыс істеу жөніндегі мемлекеттік министрі Омар Сұлтан әл-Олама, Sinovation Ventures компаниясының негізін қалаушы және бас директоры Кай-Фу Ли, Стэнфорд университетінің профессоры Илья Стребулаев, Google компаниясының зерттеулер жөніндегі директоры, Стэнфорд университетінің ғылыми қызметкері Питер Норвиг.
Сессия модераторы — Solana Foundation президенті Лили Лю.
Форум аясында үздік AI-жобалардың питч-сессиясы өтеді.
Финалға шыққандар төрт санат бойынша, соның ішінде мектеп оқушылары, колледждер мен жоғары оқу орындарының студенттері, стартап-командалар өз әзірлемелерін халықаралық сарапшыларға, инвесторларға және мемлекеттік органдар өкілдеріне таныстырады.
Іс-шара Қазақстанның Generative Nation тұжырымдамасы аясындағы әлеуетін көрсетіуге бағытталған.
Еске сала кетейік, бұған дейін Enbek.kz порталында жасанды интеллект 50 мыңнан астам бос жұмыс орнын ұсынғаны хабарланған еді.
