Павлодар мектептерінде заңсыз ақша жинаса, «жедел желіге» шағымдануға болады
ПАВЛОДАР. ҚазАқпарат - Павлодар облысында мектепте ақша жинауға қарсы «жедел желі» іске қосылды, деп хзабарлайды ҚазАқпарат тілшісі.
«Аймақтық білім басқармасында «жедел желі» жұмыс істеп тұр. Оған 8 (7182) 32-05-60 нөмірі арқылы хабарласып, мектепте, балабақшада заңсыз ақша жинауға қатысты фактілерді жеткізуге болады», - деп мәлім етті ҚР мемлекеттік қызмет істері және сыбайлас жемқторлыққа қарсы іс-қимыл агенттігінің облыстық департаментінің баспасөз қызметі.
Павлодар облыстық білім басқармасының ресми сайтында енді «Jivosite» арнайы мессенджері жұмыс істейді. Сондай-ақ осы басқарманың әлеуметтік желідегі парақшаларына да шағымданып, көкейдегі сұрақтарды қоюға болады.
«Ата-аналар Павлодар облыстық білім саласындағы бақылау департаментіне де жүгіне алады. Олар білім саласындағы заңнамалардың сақталуын қадағалап, білім сапасын сырттай тексеріп отырады», - деп түйіндеді шенеуніктер.
Егер ата-аналар білім мекемелерінде сыбайлас жемқорлық көріністеріне тап болса, олардан басы артық құжат сұрап, мазасын алса немесе мемлекеттік қызметті сапасыз көрсеткен мекемеге кез болса, 8 747 404 1424 нөмірі бойынша WhatsApp-желіге шағымдануға мүмкіндік жасалған.
