Павлодар облысында 1 млрд теңгелік ет комбинатының құрылысына прокуратура араласты
АСТАНА. KAZINFORM — Павлодар облысының Ертіс ауданында құны 1 млрд теңгеден асатын ет комбинатының құрылысы инженерлік инфрақұрылымға қаржының уақытылы бөлінбеуіне байланысты кешігуі мүмкін еді. Прокуратураның араласуынан кейін облыстық бюджеттен қажетті жұмыстарға шамамен 100 млн теңге бөлінді.
Прокуратураның мәліметінше, Павлодар облысының Ертіс ауданында құны 1 млрд теңгеден асатын ет комбинатының құрылысы аяқталуға жақын. Жобаны іске асыру аудан мен жалпы өңір үшін маңызды әлеуметтік-экономикалық мәнге ие.
Сонымен қатар, инженерлік инфрақұрылымды жүргізу жұмыстарына қаржының уақытылы бөлінбеуі инвестициялық жобаны іске асыру мерзімінің бұзылу қаупін тудырған.
— Прокуратураның араласуынан кейін қажетті инженерлік инфрақұрылымды салуға облыстық бюджеттен шамамен 100 млн теңге бөлінді. Қазіргі уақытта нысанда инженерлік желілерді тарту бойынша құрылыс-монтаж жұмыстары жүргізілуде. Оларды қараша айында аяқтау жоспарланған, — деп хабарлады құзырлы органнан.
Жол картасына сәйкес, ет комбинатын толық пайдалануға беру ағымдағы жылдың желтоқсан айында жоспарланған.
Жобаның іске қосылуы өңірде жаңа өндірістік қуаттарды құруға және Ертіс ауданындағы ет өңдеу саласының дамуына қосымша серпін береді.
Бұған дейін Павлодар облысында аудандық мәдениет үйінің 69 қызметкеріне 28 млн теңге жарна төленбей келгенін жазған едік.
