Павлодар облысында құны 1 млрд теңгеге жуық 4 жер учаскесі мемлекетке қайтарылды
ПАВЛОДАР. KAZINFORM — Павлодар облысының табиғат қорғау прокуратурасы жүргізген талдау нәтижесінде жер пайдалану саласындағы өрескел заңбұзушылықтар әшкереленді.
Анықталған кемшіліктер бойынша қабылданған шаралар негізінде кадастрлық құны 1 млрд теңгеге жуық 4 жер учаскесі мемлекет меншігіне қайтарылған.
Облыстық прокуратураның баспасөз қызметінен хабарлағандай, тексеру барысында жер телімдерін беру кезінде заң талаптарының сақталмауы және олардың ұзақ уақыт бойы нысаналы мақсаты бойынша пайдаланылмау фактілері белгілі болған.
Атап айтқанда, Екібастұз өңірінде жеке орман өсіру үшін берілген 797 гектар жерде Жер кодексінің 65-бабына қайшы түрде ешқандай ағаш отырғызу жұмыстары жүргізілмеген.
Сонымен қатар Тереңкөл және Аққулы аудандарында Су кодексінің талаптары бұзылған. Су айдындарын бекітудің бекітілген тәртібіне сәйкес міндетті келісу процедуралары өткізілместен, балық шаруашылығын жүргізу үшін үшінші тұлғаларға су қорының 820 гектар жері заңсыз беріліп кеткен.
— Табиғат қорғау прокуратурасы анықталған бұзушылықтар бойынша уәкілетті органдарға қадағалау актісін енгізді. Нәтижесінде жалпы ауданы 1600 гектардан асатын, кадастрлық құны 1 млрд теңгеге жуық пайдаланылмаған жер учаскелері мемлекетке қайтарылды, — делінген прокуратура хабарламасында.
Заңбұзушылықтарға жол берген кінәлі лауазымды тұлғалар, оның ішінде Жер қатынастары бөлімдерінің басшылары тәртіптік жауапкершілікке тартылған.
Павлодар соты банктің жетім азаматқа мемлекеттік қолдауды тоқтатуын заңсыз деп таныды.
