Павлодар облысында жол жөндеу кезінде сүйек қалдықтары табылды
АСТАНА. KAZINFORM — Табылған сүйектер бойынша полицейлер сараптама тағайындап, қылмыстық іс қозғады, деп хабарлайды Kazinform агенттігінің тілшісі.
Полицияның мәліметінше, 14 тамызда Павлодар облысының Ақтоғай ауданы Жанауыл ауылы маңындағы жол жиегіндегі жерден сүйек қалдықтары табылған.
— Жол жөндеу жұмыстары кезінде кюветтен жұмысшылар сүйек фрагменттерін тауып алды. Оқиғаның мән-жайы тергеу барысында анықталады, — деп мәлімдеді Павлодар облыстық ПД.
Айтуларынша, процессуалдық шешім тек кешенді іс-шаралар жүргізілгеннен кейін ғана қабылданады.
Еске сала кетейік, бұған дейін Петропавлда жер қазу жұмыстары кезінде адам сүйектері табылған еді.
