Павлодар облысында 30 шақырым жол жөнделіп, мерзімінен бұрын пайдалануға берілді
НҰР-СҰЛТАН. ҚазАқпарат – Павлодар облысында жалпы ұзындығы 30 шақырым болатын «Ленин – Ақсу – Көктөбе - Үлкен Ақжар – Курчатов қаласы» автомобиль жолының 165-195 шақырымындағы учаскесі мерзімінен бұрын пайдалануға берілді.
Бұл туралы ҚазАқпарат ҚР Индустрия және инфрақұрылымдық даму министрлігінің Telegram каналына сілтеме жасап хабарлайды.
Жұмыстарды «Павлодар жолдары» ЖШС мердігерлік ұйымы «Жол-Консалтинг» ЖШС техникалық қадағалауымен орындады. Жобаның авторы –«Юпитер» АО ЖШС.
Жол III техникалық санатқа жатады, жөндеу аясында жол жабындысы мен жер төсемі толық қалпына келтірілді. Учаскедегі қозғалыс қарқыны әлеуетінің ұлғаюын ескере отырып, мамандар заманауи материалдарды қолданды. Бұл жолды пайдаланудың сенімділігі мен ұзақ мерзімділігін қамтамасыз етуге мүмкіндік береді.
Жол қозғалысы қауіпсіздігін ұйымдастыру үшін 200 жол белгісі мен панно, 2000 метрден астам тосқауыл қоршаулары, 1500 дабыл бағанасы, сондай-ақ, көлденең жол белгілері орнатылып, жасанды құрылыстар орналастырылды.
Халыққа жайлы жағдай жасау үшін күрделі типтегі санитарлық блоктары бар 5 автопавильон салынды. Бұдан бөлек, Май ауылының жанында тротуарлар салынып, қысқа мерзімді демалыс алаңдары тұрғызылды.
