Павлодарда екі минутта құймақ әзірлеп беретін робот құрастырылды
АСТАНА. ҚазАқпарат - Павлодарда № 11 жалпы орта білім беру мектебінің 5-сынып оқушылары Артем Малых және Айпара Сыздықова таңғы асқа екі минутта құймақ әзірлеп беретін робот құрастырды, деп хабарлайды pavlodarnews.
Олар өздерінің бұл жобасын бүгін Назарбаев зияткерлік мектебінде робот техникасы бойынша халықаралық байқауға іріктеу барысында таныстырды.
"Мектепте сауалнама жүргізудің нәтижесінде оқушылардың 90 пайызы таңғы ас ішіп үлгермейтіні анықталды.Кейбіреуі суық бутербродтар жей салады. Сондықтан жуынып, жаттығу жасағанға дейін бұл робот құймақтар жасап қояды. Екі минуттың ішінде екі жағын аударып қуырып береді. Адам қамырды ыдысқа құйып қойса болғаны, қалғанын машина өзі атқарады. Роботтарды жинастыруға үш апта уақыт кетті", - дейді Айпара Сыздықова.
Назарбаев зияткерлік мектебі информатика және робот техникасы пәнінің ұстазы Қуаныш Мағауинның айтуынша, байқаудың тақырыптары жыл сайын ауысып отырады. Мысалы, былтыр «Жасыл энергия» аясында роботтар қалдықтарды сұрыптап контейнерге жеткізіп, табиғатты сақтауға көмектесу мақсатында жасалған.
Биыл «Азық-түлік» тақырыбы таңдалып отыр. Себебі, халықаралық кезең өтетін Тайландта тамақтану өзекті мәселеге айналған. Төменгі сатыда жемістер мен көкөністерді үш минутта сұрыптайтын, орташа санатта екі минуттың ішінде ауыл шаруашылығымен айналысатын роботтар әзірленсе, жоғары санатта теңізге шыққан корабльдер контейнерлерде тағамдарды үш минутта жеткізуі тиіс.
"Бүгінгі жарысқа 8-18 жас аралығындағы 200-ден астам оқушы келді. Әсіресе, құймақ жасайтын робот пен топырақтың құнарлығын зерттейтін, көшеттерді отырғызып, суаратын роботтар ерекше көзге түсті", - дейді Қуаныш Мағауин. 
