Павлодарда жол құрылысына ерекше асфальт пайдаланылады
ПАВЛОДАР. KAZINFORM - Ұлттық жол активтері орталығының ұсынысы бойынша биыл мердігерлер жол құрылысына ұсақ тасты мастикалық асфальтты қолдана бастады. Бұл облыстың ауа райы жағдайына сай келеді.
Биыл облыс орталығында ауқымды абаттандыру жобалары атқарылады. 15 көшенің жолы орташа жөнделіп, жолдар асфальтталады, тротуарлар салынады. Лермонтов көшесіндегі ауқымды абаттандыру жобасын аяқтау міндеті де тұр.
- Облыс орталығында көше жолдарын жөндеу жұмыстары қазірдің өзінде жүріп жатыр. Дәлірек айтқанда, көше жолдарындағы ой-шұңқырлар жамалуда. Ал орташа жөндеу және асфальттау жұмыстары алдағы уақытта басталады. Жолдардан бөлек, тротуарлар, әлеуметтік нысандардың аулалары жаңарады. Лермонтов көшесін абаттандыру жобасы аясында 38 мың шаршы метр тротуар плитасы төселіп, асфальт жабыны толық ауыстырылады. Ағаш отырғызылып, балалар ойын алаңы салынады. Бір сөзбен айтқанда қала тұрғындарының серуендеуіне арналған орындардың бірі болады деген сенімдеміз,-деп хабарлады қалалық әкімдіктен.
Мердігерлер биылдан жол құрылысына ұсақ тасты мастикалық асфальт қолданыла бастаған. Бұған дейін ұсақ түйіршікті ыстық асфальт қолданылып келіпті. Ұсақ тасты мастикалық асфальт тығыз болғандықтан, климатқа неғұрлым бейім болмақ. Ал, жол төсеу технологиясы бұрынғысынша қала береді. Мамандар жаңа үлгідегі асфальт облыстың ауа райы жағдайына сай келетінін айтады.
Еске сала кетейік, Павлодарда Усолка эко-паркінің құрылысы басталады.
