Павлодарда пойыз қағып кеткен 22 жастағы жігіт ауруханада көз жұмды
ПАВЛОДАР. KAZINFORM — Павлодар қаласының теміржол вокзалында пойыз басып кетіп, аяғынан айырылған 22 жастағы жігіт сегіз күннен кейін ауруханада қайтыс болды.
2004 жылы туған азамат 30 қыркүйек күні Павлодардағы Ғ. Сұлтанов атындағы облыстық ауруханаға аса ауыр жағдайда жеткізілген.
Өңірлік денсаулық сақтау басқармасының мәліметінше, науқас ауыр жарақат алып, сол жақ аяғынан айырылған.
— Оған шұғыл ота жасалып, кейін бірнеше рет хирургиялық ота жүргізілген. Сондай-ақ қарқынды терапия мен реанимациялық шаралар қабылданған. Алайда дәрігерлердің күш-жігеріне қарамастан, алған жарақаттарының ауырлығынан жас жігіт 8 қазанда көз жұмды, — деп хабарлады басқармадан.
Оқиғаға байланысты полиция қылмыстық іс қозғады. Қазіргі уақытта жағдайдың мән-жайы анықталып жатыр.
Еске салайық, Қарағандыда ер адамды жүк пойызы қағып кетті.
