Павлодарда соққан дауыл көптеген ғимаратты шатырсыз қалдырды
ПАВЛОДАР. ҚазАқпарат - Павлодар облысындағы ауылды жерлерде қатты желдің салдарынан мектеп, жеке ЖШС, дүкен, электр желісі кәсіпорындарының шатырлары қирап, екі көлік зақымданды. Дауылда ешкім зардап шекпеген, деп хабарлайды ҚазАқпарат.
«23 мамырда 10.20-да Железинск ауданындағы Железинка ауылында қатты желдің салдарынан (жылдамдығы 16 м/с) №2 орта мектептің 15 шаршы метр шатыры қираған. Оқиғадан ешкім зардап шекпеді», - деп хабарлады Павлодар облыстық ТЖД баспасөз қызметінен. 
Бүгін 11.50-де Ақтоғай ауылында «Ақтоғай Агро» ЖШС-на қарасты жөндеу цехының аумағы 168 шаршы метр шатырын жел (жылдамдығы 20 м/с) ұшырып әкетті. Соның салдарынан «ПРЭК АРЭС» АҚ электр желілері компаниясының төрт шаршы метрлік жабыны және екі жеңіл көлікке зақым келген. Ешкім зардап шекпеген.
«12.43-те Қашыр ауданындағы Тереңкөл ауылында Торайғыров көшесінің бойындағы «Ростик и К» дүкенінің шатырын жылдамдығы 19 м/с жел аумағы 355 шаршы метр шатырын ұшырып әкетті», - делінген хабарламада.
