Павлодарда су жылытқыш өрттің тұтануына себеп болды
ПАВЛОДАР. ҚазАқпарат – Павлодардағы Бектұров көшесі, 75-ші үйде бір бөлмелі пәтерде электр сымдарының қысқа тұйықталуы салдарынан су жылытқыш өртенген, деп хабарлайды pavlodarnews.kz.
Бұл туралы облыстық ТЖД-нің баспасөз қызметі мәлім етті. - Өрт шыққаны туралы хабарлама кезекшілік бөліміне сағат 21.30-да келіп түсті, - дейді департаментте. - Өрт сөндірушілер келгенге дейін өздігінен 17 адам сыртқа шыққан. Оның үшеуі – бала. Жоғары қабаттағы пәтерден 1983 жылғы әйел адам ауыр дәрежеде ысты газбен улану диагнозымен № 1 қалалық аурухананың жансақтау бөліміне жеткізілді. Бұдан басқа, ысты газбен уланған 2007 жылғы қыз бен 2004 жылғы ұл бала облыстық балалар ауруханасының соматика бөлімшесіне жатқызылды. Тілсіз жау сағат 22.14-де ауыздықталып, 22.27-те толығымен сөндірілді.
