Павлодарда жылу желісі жарылып, көпқабатты үйлер басқа желіге қосылды
ПАВЛОДАР. ҚазАқпарат - Әбілқайыр Сқақов Павлодардағы жылу желілері зақымдалған жерге барып қайтты, деп хабарлайды ҚазАқпарат.
Бұл туралы облыс әкімінің баспасөз қызметі мәлімет таратты.
Айта кетейік, кеше сағат 19:00 кезінде ЖЭО-1 аумағында жылу желісі жарылды, сөйтіп Павлодардың оңтүстік желі арқылы қамтылатын ғимараттарға жылу беру тоқтатылды.
Екі сағат ішінде оңтүстік желі арқылы жылумен қамтылатын ауданның тұрғын үйлері «Павлодарэнерго» АҚ ЖЭО-2 және ЖЭО-3-ке қосылды. Бұл өз кезегінде қаланың жылумен жабдықтау жүйесінің үздіксіз жұмыс істеп тұруын қамтамасыз етеді.
- Осылайша біз жылумен жабдықтау желілерінің аязда қатып қалмауының алдын алдық. Жылу температурасы төмендейді, есесіне құбырлардың зақымдалған жерін жөндеу үшін уақыт ұтамыз, - деді «ПТС» ЖШС басшысы Марат Иманаев.
Қазір «ПТС» ЖШС ЖЭО-1 қызметкерлерімен бірге жүргізіліп жатқан жөндеу жұмыстары 28 қараша сағат 10:00-да аяқталады деп жоспарланып отыр. Бұдан кейін ғана жылу желілері іске қосыла бастайды.
- Ең маңыздысы – зақымдалған жерді жөндеп, қаланы жылумен қамтамасыз ету. Тұрғын үйлерге жылу жеткеннен кейін барып, апаттың шығу себебі мен оған жауаптыларды анықтаймыз, - деп тапсырды өңір басшысы Әбілқайыр Сқақов.
28 қараша сағат 00:10-да өңір басшысы оқиға орнына барып, жағдайды бақылауға алды.
Жауапты мекеме жылу қалаға 28 қараша сағат 19:00-ге дейін беріледі деп уәде етті.
