Павлодардағы жедел басқару орталығы қалай жұмыс істейді - фоторепортаж

цоу
Фото: Мұрат Аяған/Kazinform

ПАВЛОДАР. KAZINFORM - Павлодардағы жедел басқару орталығы - елімізде алғаш ашылған заманауи құқық қорғау жүйелерінің бірі. Бұл жерде үнемі сергек жүретін, жұмысы жұрт көзіне түсе бермейтін мамандар қызмет етеді. Олар шаһардағы қоғамдық қауіпсіздікті тәуліктің әр секундында, жылдың 365 күнінде кірпік қақпай күзетеді.

камера
Фото: Мұрат Аяған/Kazinform

Ең әуелі Павлодардағы жедел басқару орталығы халыққа жедел көмектесу үшін құрылған орган екенін айтып өтейік. Күн сайын ішкі істер органдарына келіп түсіп жататын ақпараттар мен хабарламалар ағынын қорытып, жедел әрекеттің барлығы осы жерде үйлестіріледі. Орталық кең залда орналасқан. Бөлмеге кіріп келгенде алдымен көзіңізге үлкен экрандар түсер еді. Мұнда қала көшелерінің қиылысында, ғимараттардың биік тұсында орналасқан жалпы саны 117 камераның барлығы қамтылған. Әрине мұндай шамадағы камераны экрандарға бір демде сыйдыру мүмкін емес. Инспекторлар өзіне қажет аумақтар мен көше параметрлеріндегі камераларды уақыт сайын қарап, күдікті жайттарды шолып отырады.

полиция
Фото: Мұрат Аяған/Kazinform

Азаматтардың полицияға соққан телефон қоңыраулары әуелі 102 операторларының пультінде тіркеледі. Кезекті қоңырау шыр ете қалды.

- Алло, сізді кезекші оператор Әмина Дүйсенова тыңдап тұр!

Әмина
Фото: Мұрат Аяған/Kazinform

Телефон тұтқасының ар жағындағы тұрғын Толстой көшесі, 90-үй мекенжайында ішімдікке сылқия тойып алған әлдебір азаматтың подъезде қаннен-қаперсіз ұйықтап жатқаны туралы хабарлады. Оператор қыз санаулы секундтар ішінде хабарласқан жанның аты-жөнін, телефон нөмірін, мекенжайын сұрастырып, компьютердегі электронды карточкаға енгізді де, залдың жоғары жақ бөлігінде отырған аға кезекшілердің компьютеріне жібере қойды. Аға кезекшілер сол уақытта-ақ учаскелік полицейге рация арқылы хабарласып, мекенжайға барып, азаматтың кім екенін анықтауды, егер тұрақты мекені жоқ болса, арнайы қабылдау орнының көлігін шақыртуды тапсырды. Әрине бұл процестің барлығы аяқталғанша аға кезекшілер қадағалаудан шығармайды. Әминамен бірге бір ауысымда оператор Азиза Жүсіпова да 102 пультінде отыр. Екеуі қоңырауларды кезектесіп қабылдайды.

азиза
Фото: Мұрат Аяған/Kazinform

Орталықтың алғы бөлігінде бейнебақылау инспекторлары көшедегі, қоғамдық орындардағы тәртіпті камералар арқылы қадағалап отыр. Кезекші инспекторлар Малика Темірханова мен Қарлығаш Қинашева рұқсат етілмеген жердегі шылым шегу фактісін көріңіз деп монитор алдына шақырды. Айтуларынша, мұндай құқық бұзушылық күнделікті қызметтерінде жиі кездеседі.

Қарлығаш
Фото: Мұрат Аяған/Kazinform

«Мынау Павлов көшесі, 31-үйдің қабырғасына орнатылған камера, жаңа ғана автокөлік салоны алдында анау көк шалбар киген ер адам рұқсат етілмеген жерде темекі шегіп, тұқылын лақтырып кетті. Міне, өзіңіз қарап көріңіз, камерадан барлығы ап-анық көрініп тұр. Мұны аға кезекшіге баяндап үлгердім, олар патрульдік қызметті бағыттайды», - деп баяндады Қ. Қинашева.

Тап сол сәтте навигатор-кезекші Ербол Абдулла әлгі аумаққа ең жақын жерде тұрған кезекші патрульді анықтай қойды. Негізі қала көшелерінің қауіпсіздігін бақылайтын инспекторлар мен патрульдердің қайда жүргені GPS арқылы көрініп тұрады. Көлік салонының алдына көп күттірмей кезекші патрульдік полиция жетіп барды да, әлгі азаматты тоқтатып, оның қоғамдық тәртіпті бұзғанын хабарлады. Сәйкесінше, оған қатысты хаттама толтырылып, шылымқұмар азамат айыппұл арқалап қалды.

Малика
Фото: Мұрат Аяған/Kazinform

Бейнебақылау инспекторы Малика Темірханованың бұл орында қызмет етіп жатқанына 5 жылдан асқан. Талай құқық бұзушылықты камера арқылы онлайн режімде анықтап, әріптестерінің көмегімен жолын кесті, баукеспе ұрыларды ұстап, қылмыстық жауапкершіліктен жалтарғандарды құрықтады. Оның айтуынша, жедел басқару орталығы қоғамдық тәртіпті бақылауда өте тиімді құрал деп танылып келеді.

«Бірде автовокзал маңында екі әйел адам дәмханада ішімдік ішіп, бірі екіншісінің телефонын ұрлап қашады. Зардап шегуші 102-ге хабарласқан сәтте мен сол аумақтағы камераларды іске қостым. Басқару пультімен камераларды айналдыра қарай келіп, қылмыс орнынан ізін суытып бара жатқан күдіктіні көзім шалды. Патрульдік полиция әлгі әйелді айналасы 7 минуттың ішінде қолға түсіріп, телефон иесіне қайтарылды. Тағы бірде спорттық велосипед ұрланды деген жедел хабар түсті. Тал түсте мініп кеткен ғой. Камераларды шола келгенде көшелердің бірімен велосипед мінген азамат ұшырасты. Навигатор-инспектор ең жақын жердегі патруль қызметкерлеріне хабарласып, әлгіні бірден ұстады. Осының барлығы көз алдымызда, шынайы уақытта болып жатады», - дейді Малика.

Ғұмар
Фото: Мұрат Аяған/Kazinform

Өзге инспекторлар күніне 8 сағат еңбек етсе, аға кезекшілер Ғұмар Ашжанов пен Диас Есенғұлов 24 сағат бойы кірпік қақпай орталықтағы барлық процесті бақылап отырады. Себебі құқық бұзушылық анықталған сәттен бастап, оған қандай құрылымдық күштердің барғанын, қандай әрекеттер орындалғанын олар білуі әрі үйлестіріп отырулары керек.

полиция
Фото: Мұрат Аяған/Kazinform

«Жаңа ғана Атамекен кентінде бір баланы ит қауып алғаны хабарланды. Оған учаскелік полицияны жөнелттік. Назарбаев-Торайғыров көшелерінің қиылысында жаңа ғана тіркелген жол-көлік апатына «каскад» арнайы полиция патрулі аттанды. Ал Назарбаев даңғылы, 32-үйде өрт шыққаны туралы ақпарат жетті. Ол жердегі қоғамдық тәртіптің сақталуын қадағалау үшін полицейлерді жібердік, ал тұрғындарды эвакуациялау керек болса тағы қосымша күш жөнелтеміз», - деп әңгімеледі Д. Есенғұлов.

Жедел басқару орталығының бастығы Ринат Шамгунов жалпы аталған құрылымда 45 қызметкер еңбек ететінін жеткізді. Бір ауысымда шамамен 10-11 қызметкер отырады. Қала көшелерінде 117 камера болса, жергілікті құқық қорғау органдарының ғимараттарында 1700-ден астам камера орнатылған.

«Бұған қоса біздің жүйемізге мектептер мен балабақшалардың камералық жабдықтары қосылған. Қала бойынша олардың саны шамамен 15 мыңдай болып қалар. Дейтұрғанмен, біздің орталықтың байланыс құралдары мен компьютерлік жабдықтарымыз, жиһазымыз әбден ескірген. Технологиялық мүмкіндігімізді арттыру үшін биыл ЖБО толықтай жаңғыртудан өтеді деп жоспарланған. Компьютерлеріміз бен пульттеріміз, өзге де құралдарымыз жаңарса, қызмет сапасы қазіргіден де артып, тиімділік тұрғысынан тағы бір сатыға өсеміз. Қазір бір тәулікте шамамен 200-300 қоңырау түссе, жазғы уақытта олардың саны 450-500-ге жуықтайды. Мұның сыртында біздің операторларға әлдебір ақпаратты сұрап хабарласатындар бар. Ондай қоңыраулардың саны тәулігіне – 300-400. Қызметкерлеріміздің бос уақыты мүлде жоқ. Барлығы осы жүйеге жұмылып, жұдырықтай қызмет етеді», - деп баяндады Ринат Қайыргелдіұлы.

Ринат
Фото: Мұрат Аяған/Kazinform

Ол келтірген криминогендік ахуалға сүйенсек, бүгінде ұрлық, тонау фактілері айтарлықтай азайса, интернет арқылы жасалатын алаяқтық оқиғалары күн сайын үдеп келеді. Мәселен, биылғы 19-22 ақпан аралығында қалада 49 қылмыс тіркелсе, соның 34-і алаяқтық фактісі екені анықталды. Әлгі 34 оқиғаның 30-ы интернет арқылы жасалған.

«Бұрын көшеде камералар аз болғанда автокөліктің есігін бұзып, салонындағы заттарды тонау, пәтерлерді үптеп кету сияқты қылмыс көп тіркелетін. Қазір онлайн бақылаудың нәтижесінде мұндай оқиғалар азайды. Вокзал, базар сияқты адамдар көп жүретін жерлерде темекі тұқылын, азық-түлік қалдықтарын арнайы жәшіктерге лақтыруға адамдар үйрене бастады. Жол бойын кесіп өткенде де азаматтар жолағы бар жермен жүруге тырысады. Осының барлығы – қоғам мүшелерінің тәртіпке бой үйрете бастағанының дәлелі. Ал қоғамда тәртіп орнап, әрқайсымыз жауапкершілікті сезіне алсақ, біз үшін одан асқан қуаныш жоқ», - деп өз ойымен бөлісті орталық бастығы.

Жалпы, Павлодар қаласы бойынша бүгінде Оңтүстік және Солтүстік полиция бөлімдеріне қарасты 16 патрульдік учаске бар болса, оның төртеуі шаһарға қарасты ауылдарды бақылайды. Күн сайын әр учаскеде кемінде 3-4 полиция қызметкері қоғамдық тәртіпті қадағалайды.

камера
Фото: Мұрат Аяған/Kazinform

Орталық қызметкерлері айтқандай, полиция жұмысы үнемі мобильді болып, кәсібилікті шыңдауды қажет етеді. Жүйе орнында тұрмайды, себебі жыл сайын жаңашылдықтар енгізіледі. Цифрландыру да белсенді дамығандықтан босаңсуға уақыт жоқ.

полиция
Фото: Мұрат Аяғанов/Kazinform
полиция
Фото: Мұрат Аяған/Kazinform

Жедел басқару орталығына бөгде адам кірмейді. Ендеше, 102 операторына соғылатын бір қоңыраудың соңында осындай командалық қызмет атқарылып жатқанын біле жүрейік.

Соңғы жаңалықтар
telegram referendum