Павлодарлық құтқарушылар Ақмола облысына көмек көрсетуге аттанды
АСТАНА. ҚазАқпарат - ҚР ІІМ Төтенше жағдайлар комитеті төрағасының бұйрығы бойынша, 19 сәуір сағат 08.00-де павлодарлық құтқарушылар тобы су тасқынына байланысты орын алған төтенше жағдайды жою үшін Ақмола облысына аттанды.
Бұл туралы Павлодар облыстық ТЖ департаменті хабарлады.
Павлодар облыстық ТЖД Жедел-құтқару жасағына қарасты жеке құрамның 20 адамы, 5 техника мен 3 жүзу құрылғысы бүгін уақытша орналасатын жеріне жетіп, Ақмола облыстық ТЖД бастығының қарамағына өтеді.
