Павлодарлық жетім бала Мәскеудегі «Ты супер!» жобасының іріктеу кезеңінен өтті
ПАВЛОДАР. ҚазАқпарат - Павлодардағы отбасы типіндегі балалар ауылының тұрғыны Дәулетхан Ақанов «Ты супер!» атты музыкалық жобаға қатысып жатыр, деп хабарлайды ҚазАқпарат тілшісі.
«Павлодардағы отбасы типіндегі балалар ауылының тұрғыны Дәулетхан Ақанов НТВ-ның Мәскеуде болып жатқан «Ты супер!» музыкалық жобасының алғашқы іріктеу турынан өтті. Оны композиторлар - Виктор Дробыш, Игорь Крутой, әншілер - Юлиана Караулова, Сергей Лазаревтерден құралған қазылар алқасы бағалады», - дейді Павлодар облыстық білім басқармасының өкілдері.
Байқауға ТМД елдерінің өкілдері, сондай-ақ Сириядан барған балалар да қатысып жатыр.
«Осындай ауқымды конкурста Дәулетхан өз дарынын паш ете білді. Бұл әркімге де бұйыра беретін бақ емес», - дейді оны апарған тәрбиешісі Гүлжан Тауова.
«Мен қатты толқыдым. Мұндай үлкен байқауда Қазақстан Республикасының атынан қатысу, Отанымның абыройын асқақтату - маған үлкен жауапкершілік жүктейді», - дейді Дәулетхан.
