Педагог мамандар қартайып барады - Б.Жұмағұлов
ТАНА. 6 қыркүйек. ҚазАқпарат /Айдар Оспаналиев/ - Білім саласындағы шешілмеген өзекті мәселелердің бірі білім беру сапасымен, педагог кадрлардың қартаюымен және мамандардың бәсекеге қабілеттілігінің төмендігімен байланысты. Бұл туралы бүгін Астанада өтіп жатқан «Тәуелсіздікке 20 жыл: Қазақстан Республикасындағы адам капиталын дамытудың сапасы мен болашағы» атты халықаралық конференция барысында Білім және ғылым министрі Бақытжан Жұмағұлов мәлім етті.
Оның сөзіне қарағанда, білім беру саласында осы тектес әлі де
болса белгілі бір қайшылықтар, шешілмеген мәселелер баршылық. Сондықтан, білім беру тетіктері мен адами капиталды қалыптастыру - Қазақстанның өзекті міндеттері болып қала бермек.
«Бұл міндеттер Елбасымыздың бастамасымен әзірленген Индустриалды-инновациялық даму бағдарламасында және Қазақстанда интеллектуалды ұлтты қалыптастыру жөніндегі бағдарламада айқын көрініс тапқан. Бұған қоса Қазақстан Республикасында білім беруді дамытудың 2011-2020 жылдарға арналған мемлекеттік бағдарламасы бекітілді. Бағдарламаның ерекшелігі - білімнің жаңа сапасына көшу. Осы бағдарламада қарастырылған институционалды қайта құрулар біздің жұмысымыздың базалық бағытын анықтайды. Келешекке нақты міндеттер жүктейді»,-деді министр.
