Перизат Қайратқа қатысты қылмыстық істі тергеу аяқталды

АСТАНА. KAZINFORM — Перизат Қайраттың ісін тергеу барысында келтірілген шығын 3,5 млрд теңге сомасында анықталды.

Бұл туралы Қаржылық мониторинг агенттігі төрағасының орынбасары Жеңіс Елемесов айтты.

— Перизат Қайратқа қатысты қылмыстық істі тергеу аяқталды. Қазіргі кезде материалдармен таныстыру процесі жүріп жатыр. Естеріңізде болса, қылмыстық істі тергеу барысында келтірілген шығын бойынша әртүрлі сома айтылған еді. Қазір 3,5 млрд теңге сомасындағы шығын анықталды, — деді Ж. Елемесов Сенаттың жалпы отырысынан кейін тілшілер сұрағына жауап бере отырып.

Оның айтуынша, П. Қайраттың тәркіленген мүлкі бойынша соңғы шешімді сот шығарады. Бұл мүлік зардап шеккендерге келтірілген шығынды өтеуге немесе мемлекеттің меншігіне өтеді.

Сонымен қатар Ж. Елемесов аталған іс бойынша күдікке Перизаттың анасы да іліккенін нақтылады.

— Анасы үй қамақта. Екеуі де күдікті. Анасын да алаяқтық бабы мен қылмыстық жолмен тапқан ақшаны жылыстату бойынша тергелді. Ол қызына көмектесіп, түскен ақшаны өзінің есеп-шотына аударған. Кейін осы қаражатты банктен шешіп, үй мен көлік сатып алған. Гүл сататын дүкендерді алуға көмектескен, — деді агенттік төрағасының орынбасары.

Оның сөзіне қарағанда, күдікті Перизат жаңа оңалту орталығының құрылысына, су тасқынының зардаптарын жоюға, Палестинада зардап шеккендерге қаражат жинаған. Бұл 190-бап бойынша үш эпизод алаяқтық бойынша тексерілді, оларға қатысты тергеу аяқталды. Сондай-ақ қылмыстық жолмен табылған қаражатты активтерге біріктіру арқылы жасырған екі факті бар.

— Дәл қазір зардап шеккендердің нақты санын айта алмаймын, олардың саны өте көп. Қомақты қаржы салған жәбірленушілер бар. Бұл істер бойынша Перизат Қайрат өз кінәсін мойындамай отыр, — деді Ж. Елемесов.

Еске салсақ, еріктілер қозғалысының белсендісі және қоғамдық қайырымдылық қорының құрылтайшысы Перизат Қайратқа қатысты тергеу жүргізіліп жатқаны 14 қарашада белгілі болды.

Артынша Перизат Қайрат параспорт федерациясындағы қызметінен алынды.

Сонымен қатар сот санкциясымен Перизат Қайраттың дүние-мүлкіне шектеу қойылғаны анықталды.

Бұған дейін Перизат Қайрат Палестина тұрғындарына гуманитарлық көмек көрсету үшін қаражат жинауды ұйымдастырғаны туралы хабарлаған едік. Бұл эпизод бойынша Перизат Қайрат 200 млн теңгеден аса қаражатты жымқырды деп күдіктелуде.

Кейіннен Перизат Қайраттың ісі 100 томнан асқаны мәлім болды.

Ал оның «Biz birgemiz Qazaqstan 2030» қоғамдық бірлестігі таратылғаны айтылды.