Петропавл мектебіндегі оқиға: білім ордасының әкімшілігі қалай әрекет етті
АСТАНА. ҚазАқпарат – Солтүстік Қазақстан облысы әкімінің бірінші орынбасары Марат Тасмағанбетов Петропавл мектебінде оқушыларға жасалған шабуыл кезінде мектеп әкімшілігінің қалай әрекет еткенін айтты, деп хабарлайды ҚазАқпарат тілшісі.
«Мектеп әкімшілігі жедел әрекет етті. Олар жедел жәрдем шақырып, дабыл түймесі арқылы сигнал берді. 3 минут ішінде күзет агенттігінің кезекші тобы келді. Зардап шеккендерге мектеп дәрігерлері алғашқы медициналық көмек көрсетті», - деді Марат Тасмағанбетов Оқу-ағарту министрлігінің шұғыл кеңесінде.
Әкімнің орынбасары зардап шеккен 3 адамның екеуі ауруханаға жатқызылғанын айтты. Қазіргі уақытта олар реанимациядан жалпы палатаға ауыстырылған. Балалардың жағдайы қанағаттанарлық.
Еске салсақ, кеше Петропавлда 9 сынып оқушысы мектепке балта мен пышақ ала келіп, 3 оқушыны жарақаттады. Кейін зардап шеккен екі балаға ота жасалды.
Бұл оқиғаға қатысты түсініктеме берген Премьер-Министрдің орынбасары Алтай Көлгінов аталған мектепте лицензиясы бар күзет қызметі болмағанын мәлім етті.
