Петропавл тұрғыны орманнан қару тауып алды
ПЕТРОПАВЛ. ҚазАқпарат - Петропавл тұрғыны орманда ағаштардың түбінен қару салынған қап тауып алды, деп хабарлайды ҚазАқпарат тілшісі.
Облыстық ішкі істер департаменті баспасөз қызметі өкілдерінің айтуынша, әйел полицияға әкеп тапсырған қару «ТОЗ-16» маркалы карабин болып шыққан. Қазір оған сараптама жүргізіліп жатыр. Атап айтқанда, республика аумағында жасалған қылмыстарға қатысы бар-жоғы тексерілуде.
«Тексерістер аяқталған соң арнаулы комиссия сыйақы төлеу туралы шешім қабылдайды. Осы сияқты иір ойықты қаруларға ең көп мөлшерде сыйақы беріледі», - дейді Петропавл ІІБ әкімшілік полиция бөлімінің бастығы Әсел Кокушова.
Қаруды өз еркімен әкеп тапсыру акциясы аясында солтүстікқазақстандықтар 3,2 мыңнан астам оқ-дәрі және заңды түрде тіркелмеген 27 қаруды тапсырған. Соның 4-еуі - иір ойықты мылтықтар. Комиссия оларға жалпы 800 мың теңгеден астам сыйақы белгіледі.
