Петропавлда күрд мәдени орталығы зейнеткерлерге тегін балық таратты
ПЕТРОПАВЛ. KAZINFORM – Алғыс айту күніне орай Петропавлда түрлі іс-шара өтіп жатыр. Кезінде өңірге күшпен қоныстандырылған күрд халқының өкілдері де шет қалмай, қайырымдылық акциясын өткізді.
Қайырымдылық іс-шарасы Петропавлдағы 20 шағын ауданда орналасқан сауда орталығының алдында өтті. Зейнеткерлер у-шусыз кезекке тұрып, тегін балықты бірінен кейін бірі тәртіппен әкетіп жатты. Ұйымдастырушылар бір қолға 4 келі балықтан берді.
«Алғыс айту күніне орай акция ұйымдастыруды шештік. Күрд мәдени орталығы 400 келі балық сатып алып, зейнеткерлерге тегін үлестіріп жатыр. Осылайша мерекелік көңіл-күй сылауды жөн көрдік.
Жалпы бұл іс-шараның мақсаты - әр күнімізді бағалауға, әрқайсымыздың бойымызда ізгі ниетті дамытуға шақыру.
Мерекеге орай еліме бейбітшілік, Қазақстаныма өсіп-өркендеуді тілеймін.
Мұндай акция үшінші жыл қатарынан 1 наурызда өткізіліп келеді. Жалпы қайырымдылық іс-шараларын жиі жасаймыз, қайырымдылық жасасаң, қайырымын өзің көресің деген бар», - дейді Солтүстік Қазақстан облысы бойынша күрд мәдени орталығының өкілі Расим Афандиев.
Акция туралы әлеуметтік желіде хабарландыру болған, сондықтан келушілердің қарасы қалың болды.
«Күрд мәдени орталығына алғыс айтамын, олар жылда қайырымдылық іс-шарасын өткізеді. Біз сияқты зейнеткерлерді назардан тыс қалдырмайды. Былтыр да келдім, биыл да балықты тегін алып тұрмын, бізге бұл аз да болса көмек», - дейді қала тұрғыны Людмила Бондаренко.
