Петропавлда күрделі жөндеуден өткен теміржол вокзалы желтоқсанда пайдалануға беріледі

ПЕТРОПАВЛ. ҚазАқпарат – Петропавлда теміржол вокзалы 3 млрд теңгеге күрделі жөнделіп, заманауи жарақтандырылған нысан желтоқсан айында пайдалануға берілмек, деп хабарлайды ҚазАқпарат тілшісі.

Петропавл теміржол вокзалында жөндеу жұмыстары 2018 жылы басталды. Жобаны жүзеге асыруға «Ресей теміржолдары» АҚ 3 млрд жуық теңге инвестиция құйды. Осы уақытқа дейін тиісті жұмыстардың 75% атқарылып, ғимараттың шатыры мен қасбеті ауыстырылды.

«Ғимарат 1959 жылы салынған. Содан бері мұнда күрделі жөндеу жұмыстары жүргізілмеген. Қазір вокзалдың шығыс бөлігі дайын. Құрылыс материалдары уақтылы жеткізіліп, нысанда 70-ке жуық жұмысшы еңбектеніп жатыр. Бұрын мұнда бір де бір лифт болмаса, енді оның үшеуін қоямыз, сондай-ақ эскалатор жұмыс істейді», - дейді «РТЖ» АҚ Петропавл бөлімінің инвестиция секторының бас инженері Станислав Таратута.

Жөнделіп жатқан нысанда жолаушыларға барлық ыңғайлы жағдай жасалмақ. Қазір бұл жерде отандық 5 бірдей мердігер компания жұмыс істеп жатыр. Желдеткіштер жаңартылды, таблолар ауыстырылып, күту залындағы киоскілер алынып тасталды. Мұнда енді кішігірім асханалар мен газет-журнал сататын бутиктер ғана қалмақ.

Күрделі жөнделген Петропавл теміржол вокзалы желтоқсанда пайдалануға беріледі.