Петропавлда мереке күндері «102» арнасына 1,6 мыңнан астам телефон қоңырауы түсті
ПЕТРОПАВЛ. ҚазАқпарат – Петропавл полицейлері мереке күндері күшейтілген режімде қызмет атқарды. Төрт күнде тек «102» арнасына ғана 1600-ден астам қоңырау түскен, деп хабарлайды ҚазАқпарат тілшісі.
Солтүстік Қазақстан облысы полиция департаменті баспасөз қызметінің мәліметінше, облыс орталығында азаматтардың тыныштығы мен қауіпсіздігін тәулік бойы 200-ден астам полиция қызметкері қамтамасыз етті. Нәтижесінде, жылдың соңғы күні - жаңа жыл түні тыныш өтті.
Петропавл қалалық полиция басқармасы жедел басқару орталығының бастығы Ерік Құлжановтың айтуынша, 31 желтоқсаннан 1 қаңтарға қараған түні «102» пультіне 389 рет телефон қоңырауы келіп түскен. Соның 91 жағдайы полиция қызметкерлерінің жедел ден қоюын қажет етті.
Жалпы, мереке күндері, 31 желтоқсан мен 3 қаңтар аралығында полиция қызметкерлері 1600-ден астам телефон қоңырауын қабылдады. Оның ішінде 479 хабарлама – жасалған қылмыстар мен оқиғалар туралы; 21-і – жол-көлік оқиғалары бойынша; түнгі уақытта тыныштықты бұзу бойынша – 17 қоңырау түскен. Сондай-ақ отбасылық жанжалдарға қатысты 45 қоңырау және ұрлық фактілері бойынша 26 хабарлама тіркелді.
Петропавл қалалық жедел басқару орталығының кезекші бейнебақылау инспекторлары мереке күндері 61 әкімшілік құқық бұзушылықты; жол жүрісі қағидаларын бұзудың 26 фактісін және қоғамдық орындарда ішімдік ішіп, мас күйде жүрудің 35 дерегін тіркеді.
